Esta entrada por desgraza non é como as demais. A fin desta é a denuncia a unha inxuria á nosa terra amparada e fomentada tristemente pola Televisión de Galicia.
Sabede habitantes do Salnés e da Galiza enteira que un ridículo forasteiro non só se dedicou a atacar á Virxe da Lanzada senón que asestou unha patada na alma da nosa terra, no noso xeito de ser, naquilo que herdamos dos nosos devanceiros !
Chega á comarca do Salnés, á beira do mar que nos define, un señorito da televisión. Un home que, coa prepotencia que lle dá o show business, pensa que pode xulgar e desprezar a nosa esencia.
O noso crime? Manter viva unha tradición ancestral. A tradición das nove ondas da Lanzada da que xa se ten falado neste blog. Non é un capricho; é un rito que perdura ano tras ano, século tras século. Este rito posibelmente milenario nace do sincretismo e da fonda espranza humana: a de concibir. As mulleres que non atopan remedio na ciencia acoden á praia, antes de que saia o sol, a buscar o amparo da nosa terra, o amparo da Virxe na que tanto cren pois para algunhas esta é a súa última opción. ¡Isto é idiosincrasia!
E mentres unha veciña da zona lle explica ao señorito andaluz, con toda a humildade do mundo, o noso patrimonio cultural, o cantante forasteiro vomita a súa grosería tan babosa: «A mí no me hace falta eso, las mandas a mi casa y no hay problema».
¡Que soberbia! Ridiculiza cos seus aires castelanizadores un ritual da terra ao que acoden moitas mulleres e que é parte do noso fondo cultural inmaterial.
E que dicir daqueles outros membros do programa. Da Televisión de Galicia. A cal debería defender o noso por riba de todo. Aló quedos, rindo e engadindo as súas propias mofas. É a proba máis triste de que a vaidade do show pode facer que os nosos se rían do noso. A complicidade na mofa dana a nosa identidade tanto coma a ofensa do forasteiro.
Que saiba esta xente que as nosas tradicións non son un chiste fácil para un programa de televisión. Son a nosa historia, o noso xeito de estar no mundo. É unha "falta de respeto" monumental que se conte a nosa historia e se responda con ese desprezo nun medio de comunicación público pagado por todos os galegos e galegas. Un medio que debe amar o noso e non vender á patria, á nazón ao estranxeiro
A burla á tradición é o desprezo á nosa esencia. ¡Que se retraten publicamente por pisotear o que nos define como pobo! Non só o señor (por chamarlle algo) Osborne senón tódolos seus complices así como a propia Televisión de Galicia por amparar esta clase de ataques e ofensas de tan mal gusto, a un pobo que xa leva moito tempo asoballado por foráneos.
GUILLERMO RODIÑO (2025)
Bertín ascendeu de porco a marrán...
ResponderEliminar