SOBRE O AUTOR E O BLOG

Chámome Guillermo Rodiño Requejo, estudante de Historia na USC. Son un mozo apaixonado pola historia e pola miña terra, sempre con ganas de aprender e de mirar o mundo cunha ollada curiosa.

Non me lembro dun tempo no que non tivera preguntas na cabeza: de onde vimos, quen fomos, que queda de nós hoxe. Esa inquedanza foi a que me levou a estudar Historia e tamén a abrir este recuncho na rede.

Este blog naceu coa idea de ser un miradoiro persoal, unha xanela desde a que compartir pequenas historias, lendas, costumes e recordos, para que non se perdan e para que tamén viaxen máis alá do Salnés. Aquí mestúrase o rigor do estudante co entusiasmo dun rapaz que nunca deixa de sorprenderse.

A miña pretensión non é dar leccións, senón contar o que vou descubrindo e o que forma parte do noso patrimonio cultural. Unhas veces serán relatos do pasado, outras lembranzas familiares, outras reflexións ou curiosidades. Sempre coa idea de preservar raíces e transmitir a riqueza do que somos.

En pleno século XXI, sabemos que as nosas vilas e aldeas cambiaron moito: o que antes era mundo rural agora é case urbano, e os costumes xa non son os mesmos. Mais a esencia segue aí, latexa en cada recuncho, e cómpre non esquecela.

O Miradoiro do Salnés é, pois, un proxecto feito con humor, con espírito crítico cando fai falla, e sobre todo con moito cariño pola terra.

Así que benvidos a quen chegue ata aquí. A idea é sinxela: mirar, lembrar, contar e compartir.

Pasade, que a porta está aberta.

-GUILLERMO RODIÑO (2025)

Comentarios

Entradas populares de este blog

LIMIAR

DEBUXO DO AUTOR PRIMEIRAS VERBAS Para a miña ledicia, e espero que tamén para a vosa, estréase hoxe O Miradoiro do Salnés . A idea deste blog vén de hai tempo. Sempre tiven o desexo de contar cun voceiro propio, un espazo no que dar a coñecer ao mundo a nosa terra, Galicia, coas súas historias, lembranzas e tesouros agochados. Foi no verán de 2025 cando, por fin, me decidín a poñer en marcha esta pequena viaxe compartida. Este blog nace da curiosidade e do agarimo por unha terra que fala sempre, se un sabe escoitala. Cada praia, cada viña, cada pedra de castro ou cada vella igrexa ten algo que contar. O meu propósito é sinxelo: compartir esas historias, grandes ou pequenas, que fan do Salnés un lugar único. Mais non só falarei do Salnés. A historia, a arte e a cultura lévannos por camiños que moitas veces saen fóra da nosa comarca, e tamén quero abrir aquí a porta a esas outras paisaxes, vilas e tradicións que forman parte do noso mundo galego e atlántico. Non se trata aquí de dar lec...

O Cruceiro máxico do Monte Faro (Noalla)

DEBUXO DO AUTOR o corazón do monte Faro, en plena parroquia de Santo Estevo de Noalla (concello de Sanxenxo), érguese un cruceiro que segue vivo, alimentado polas ofrendas que constantemente repousan ao seu carón. Non é un cruceiro calquera: na súa base acumúlanse cirios acesos, flores e, de maneira sorprendente, zapatillas que deixan os devotos como símbolo de promesas ou peticións cumpridas. A xente di que este cruceiro está ligado á maxia e aos ritos escuros, un espazo onde o sagrado e o popular conviven nun mesmo altar de pedra. As ánimas do purgatorio semellan acompañar o seu silencio, convertendo o lugar nun punto de encontro entre o mundo visible e o invisible. Mais se por algo é coñecido este cruceiro é pola súa lenda máis pintoresca, transmitida de xeración en xeración. Conta a tradición que quen padeza almorrás debe deixar unha moeda na súa base, baixar os pantalóns e sentarse enriba dela mentres recita unha oración. O rito complétase coa asistencia a unha misa na igr...

A MORTE EN GALICIA : UN PERCORRIDO POLAS NOSAS TRADICIÓNS DA ULTRATUMBA

ÁNIMAS DO PURGATORIO . DEBUXO DO AUTOR INTRODUCIÓN alicia conta cun amplo e diverso patrimonio cultural relacionado coa morte, do cal forman parte numerosos elementos inmateriais: mitos, lendas, tradicións ancestrais, supersticións, festas… Con este traballo preténdese realizar un estudo onde se reflicta a importancia da morte na cultura galega, analizando dende un punto de vista xeral os seus ritos, crenzas, lendas e mesmo festas nas que a morte e o mundo da ultratumba se converten nos principais protagonistas. O home no progreso da súa evolución descubriu un elemento que trastornaría a vida para sempre. A conciencia da presenza da morte e a certeza de que a todos visitará, ricos e pobres. Galicia, quizais polo seu atraso histórico, o seu illamento, ou a dispersión xeográfica dos seus diminutos núcleos de poboación, chegou tarde á modernidade e aínda mantén costumes e ritos da sociedade agrícola que noutros lugares se perderon baixo o peso da industrialización, o peso do ...

Buscar este blog